Kriza e strehimit, Sanchez jep dorëheqjen, Spanja në zgjedhje të parakohshme më 29 nëntor
Pedro Sánchez ka shpallur zgjedhje të parakohshme më 29 nëntor, pas rrëzimit në Parlament të dy dekreteve për strehimin.
Kryeministri spanjoll Pedro Sanchez ka njoftuar zhvillimin e zgjedhjeve të përgjithshme të parakohshme më 29 nëntor 2026, duke i dhënë fund para kohe legjislaturës aktuale. Vendimi u bë publik gjatë një deklarate institucionale nga Pallati Moncloa dhe vjen vetëm pak ditë pasi Kongresi i Deputetëve rrëzoi dy dekretet e qeverisë për strehimin.
Sanchez, i cili drejton qeverinë spanjolle që prej vitit 2018, deklaroi se ekzekutivi kishte bërë gjithçka që mundej për të mbrojtur interesat e qytetarëve, ndërsa pranoi se gjatë qeverisjes janë bërë edhe gabime. Ai argumentoi se për të çuar përpara masa të tjera nevojitet një mbështetje më e gjerë parlamentare dhe se tashmë u takon qytetarëve të vendosin për të ardhmen e vendit.
Vendimi erdhi pas një fundjave konsultimesh të Sánchez me drejtues të Partisë Socialiste dhe anëtarë të qeverisë. Mundësia e zgjedhjeve të parakohshme ishte diskutuar intensivisht pas rrëzimit në Kongres të dy dekreteve për strehimin, me votat kundër të PP-së, Vox-it dhe Junts. Data 29 nëntor ishte edhe data e parë e mundshme për zhvillimin e zgjedhjeve sipas afateve të parashikuara nga legjislacioni zgjedhor spanjoll.
Kriza e strehimit në qendër të zhvillimeve politike
Zgjedhjet e parakohshme vijnë në një klimë protestash për krizën e strehimit. Dy dekretet e rrëzuara nga Kongresi përfshinin masa që synonin mbrojtjen nga dëbimet dhe ndërhyrje të tjera në tregun e banesave. Protestat u intensifikuan edhe pas dëbimit nga banesa në Madrid të një gruaje 87-vjeçare, ngjarje që nxiti mobilizime dhe një kamp proteste në Puerta del Sol.
Sanchez kishte kaluar ditët e fundit duke vlerësuar nëse do të vazhdonte përpjekjet për të negociuar masa të reja për strehimin apo do të çonte vendin drejt zgjedhjeve. Vendimi për votime më 29 nëntor e ndërpret legjislaturën disa muaj përpara përfundimit të saj të parashikuar në vitin 2027.
Sondazhet favorizojnë PP-në
Fushata zgjedhore nis në një moment kur sondazhet e fundit e vendosin Partinë Popullore të Alberto Núñez Feijóo përpara socialistëve të Sánchez. Megjithatë, matjet e opinionit përfaqësojnë vetëm situatën në momentin kur janë zhvilluar dhe jo rezultatin e zgjedhjeve të 29 nëntorit. Kriza e strehimit pritet të jetë një nga çështjet kryesore të debatit gjatë fushatës.
k.jpg)